Umsóknarfreistin til Veðurlagsvirðislønina er mánadagin
Tín skúli kann eisini søkja. Freistin er mánadagin 24. mars.20.03.2025
Umsóknin skal vera stutt, fyllast út í umsóknarskjali, sum tú finnur her, og sendast Lærarafelagnum. Aftrat umsóknini kunnu viðfestast stutt viðkomandi skjøl, sum t.d. frágreiðing um átøk og tiltøk, úrslit ella viðmæli frá triðjaparti.
Síðst í apríl verður Veðurlagsvirðisløn Føroya Lærarafelags handað á fimta sinni. Veðurlagsvirðislønin var handað fyrstu ferð í 2020. Tað er Føroya Lærarafelag, sum í samstarvi við Betri og Føroya Náttúru og umhvørvisfelag skipa fyri Veðurlagsvirðislønini.
Í fjør – 2024 – var tað Eiðis skúli, sum fekk Veðurlagsvirðislønina hjá Føroya Lærarafelag. Eiðis skúli fekk virðislønina fyri stóra arbeiðið, sum tey í undirvísingarhøpi gera fyri at ávirka næmingarnar og geva teimum kunnleika um veðurlags- og umhvørvisavbjóðingar. Tey hava í fleiri ár arbeitt miðvíst við burðardyggari menning, har tey serliga arbeiða út frá teimum staðbundnu loysnunum og umhvørvinum, sum næmingarnir kenna. Hetta er sostatt blivin ein inngrógvin partur av skúlaárinum.
- Endamálið er at økja tilvitanina um, hvussu vit kunnu taka ábyrgd og ogna okkum vitan um verðurlagsbroytingar og loysnir, siga tey í Eiðis skúla.
Hvat hava tey so gjørt? Jú, tey hava eitt nú arbeitt við endurnýtslu, seymað taskur úr endurnýtslutoyi, gjørt jólaeinglar úr horni, tálg til fuglafóður, endurnýtt træsprek og tunnufjalar til vevar og skilt burturkast. Tey hava sátt grønmeti og velt epli í skúlagarðinum, flett seyð, kúgv, haru og roytt havhestaungar. Skorið upp springarar, fiskað og hagreitt fiskin, umframt verið eftir eggum, sum verða nýtt í matgerð. Dentur verður lagdur á at nýta staðbundnu loysnirnar.
Í 2023 var tað Runavíkar kommunuskúli – A-gongin við Løkin, sum vann veðurlagsvirðislønina. A-gongin tók til sín íverksetanarhugskotið hjá 10. flokki í skúlanum. Tey vunnu skúlaFM við hugskotinum. Hugskotið hevur til endamáls at brúka ull í sambandi við, at epli verða sett niður. Ullin verður løgd undir eplini, tá tey verða sett niður. Hetta ger stóran mun, tí ullin inniheldur nitrogen, carbon, calsium, magnesium, jarn og annað, sum er gott fyri moldina. Ullin er eisini natúrlig fyribyrging móti smákyktum. Aðrir fyrimunir eru við temperaturskipanini, tað er at í staðin fyri, at tað er kalt summar dagar og heitt aðrar, so fært tú umleið sama temperatur hvønn dag. Ullin upptekur eisini vatn, til umleið 20 ferðir sína egnu vekt, og hetta gagnar vakstrarumstøðunum.
Tvey ár á rað – í 2022 og 2021 – vann Skála skúli Veðurlagsvirðislønina. Skála skúli hevur í nøkur ár arbeitt við tí burðardygga, og næmingarnir eru við í øllum og altíð fúsir at fara í gongd við okkurt nýtt. Alt fer fram í eini tilgongd. Sumt er komið í fasta legu, meðan annað er í eini byrjanartilgongd, og uppaftur annað er fyri framman. Tað, sum er komið í fasta legu, er at skilja rusk, at gera egna mold, einki einnýtistilfar at brúka og endurnýta pappír. Somuleiðis eru næmingarnir farnir undir at evna til og seyma einnýtisnet at hava heim við og til handilin at nýta. Eisini eru tey farin undir at velta epli, røtur og ymiskt grønmeti, at hava høsna- og dunnugarð, fletta og fiska og gera pappír.
Allir næmingar eru við í arbeiðinum, frá forskúlanum til sjeynda flokk. Skála skúli er ein skúli, ið hevur skarað framúr í arbeiðinum at geva børnum og ungum áhuga fyri og innlit í veðurlagsavbjóðingar og loysnir á veðurlagsavbjóðingum.
Fyrstu Veðurlagsvirðislønina – í 2020 – vann Eysturskúlin í Havn. Tað vann hann fyri eina verkætlan, ið er ein ringrás. Ringrásin er matrestir, sum verða til mold, sum síðan verður brúkt til at sáa í; grøðin verður etin, og tískil skal hon ikki flytast inn úr øðrum londum; trø verða plantað, og tað gevur góða luft.
Á aðalfundinum hjá Føroya Lærarafelag 26. apríl verður fimti vinnari av Veðurlagsvirðislønini kosin. Vinnarin fekk handað veðurlagsprógv 2020, ein kekk á 25.000 kr, umframt ein berjarunn og føðsluplantur, ið skúlin kann nýta í sínum arbeiði víðari.
Freistin at senda umsókn er 24. mars. Les meiri her.
