Tín skúli kann eisini vinna Veðurlagsvirðisløn Føroya Lærarafelags
Freistin at søkja er 28. mars24.02.2023
Fjórða árið á rað ber til at søkja um at vinna Veðurlagsvirðisløn Føroya Lærarafelags. Vinnarin av Veðurlagsvirðisløn Føroya Lærarafelags er ein skúli, ið hevur skarað framúr í arbeiðinum at geva børnum og ungum áhuga fyri og innlit í veðurlagsavbjóðingar og loysnir á veðurlagsavbjóðingum.
Ungdómurin gongur á odda fyri broytingum kring heimin. Lærarafelagið vil, at føroyski skúlin í størri mun eggjar børnum og ungum at arbeiða við veðurlags- og umhvørvisavbjóðingum, so at børn og ung fáa øktan áhuga í at finna loysnir.
Hvør kann søkja?
Allir fólkaskúlar og frískúlar, sum hava virkað fyri burðardygd og arbeitt við veðurlagsavbjóðingum, kunnu søkja um Veðurlagsvirðisløn Føroya Lærarafelags. Tað kann vera allur skúlin, ein deild, ein flokkur ella ein bólkur, ið hevur arbeitt við evninum.
Krøv til umsøkjarar
Virðislønin verður latin skúla, ið hevur lokið minst eitt av hesum krøvum:
· Skarað framúr í arbeiðinum við útbúgving í burðardyggari menning.
· Verið virkin í arbeiði at økja tilvitanina um, hvussu veðurlagsavbjóðingar kunnu loysast. Eitt nú við staðbundnum loysnum innan orkunýtslu, burturkast, nýtslu, keyp og flutning.
· Fingið burðardygga menning við í arbeiðið ella undirvísingina á skúlanum.
Virðislønin
Vinnarin fær eitt heiðursbræv og har afturat 25.000 krónur. Peningurin skal í mestan mun fara til at arbeiða víðari við veðurlagsavbjóðingum.
Í 2020 vann Eysturskúlin í Havn, og í 2021 og 2022 vann Skála skúli.
Umsóknin skal í mesta lagi vera eina síðu, verður fylt í umsóknarskjalið og send til lararaf@lararafelag.fo. Afturat umsóknini kunnu viðfestast stutt viðkomandi skjøl, sum t.d. frágreiðing um átøk og tiltøk, úrslit ella viðmæli frá triðjaparti.
Les meiri um virðislønina: http://skulabladid.fo/veðurlagsvirðisløn-1
Á myndini vinnararnir frá í fjør saman við umboðum frá Føroya Lærarafelag og FNU.
