Tá foreldrini skeldast, stúra børnini

Stór kanning, sum danska Barnaráðið hevur staðið fyri, vísir, at skeldast foreldrini ofta og ógvisliga, fara børnini at hugsa um, at foreldrini ætla sær at skiljast. Tey ungu, ið stúra fyri hjúnaskilnaði, eru minni nøgd og glað enn onnur ung, vísir kanning, sum er gjørd millum 1500 ung í 8. flokki

01.04.2016

Ung, sum stúra fyri, at foreldrini fara hvør til sítt, skora lægri enn onnur ung á sokallaðu trivnaðarparametrunum. Tey tosa sjáldnari við nakran, um tey hava trupulleikar, stúranir og sorgir. Harumfram føla 40 prosent av teimum ungu, sum hugsa ofta um hjúnaskilnað, seg altíð ella av og á einslig. Sama er galdandi fyri 21 prosent av teimum ungu, sum sjáldan hugsa um hjúnaskilnað.

- Tørvur er at varpa ljós á hesi ungu, sum ganga við tungum tankum um, at foreldrini fara hvør til sítt. Foreldur eiga at hugsa um, hvat tað ger við børnini, at tey skeldast, og so fari eg at heita á onnur vaksin, til dømis lærarar og námsfrøðingar, um at tosa við barnið, um tey hava varhugan av, at okkurt er áfatt, sigur Per Larsen, formaður í danska Barnaráðnum.

Svarini frá teimum ungu vísa, at tey flestu koma úr góðum heimum, har stemningurin dagliga er góður. 7 prosent av teimum ungu halda tó, at tað er ógvuliga vánaligur ella vánaligur stemningur heima. Stemningurin hongur saman við, hvussu nøgd og glað tey ungu eru: 43 prosent av teimum ungu, sum halda, at stemningurin dagliga er ógvuliga vánaligur ella vánaligur, vísa seg at vera illa nøgd og lítið glað, meðan tað sama er galdandi fyri 12 prosent av teimum ungu, sum halda, at stemningurin heima er ógvuliga góður ella góður.

- Tað kunnu vera nógvar grundir til, at stemningurin heima er vánaligur. Summi skulu kanska gera sær greitt, um gerandisdagurin er ov strongdur. Samstundis heita vit á politikararnar at taka á seg ábyrgdina at skapa betri kor fyri barnafamiljurnar. Tað kann geva familjunum ta tíð, sum skal til fyri at skapa tryggar karmar um børnini, sigur Per Larsen.

Høvuðsúrslit:

- 14 prosent av teimum ungu, sum liva í kjarnufamiljum, hugsa av og á um, at foreldrini fara hvør til sítt.
- Tey ungu, sum oftari hugsa, at foreldrini fara hvør til sítt, trívast verri á nógvum økjum enn onnur ung. Til dømis kenna 40 prosent seg altíð ella av og á einslig, meðan tað sama er galdandi fyri 21 prosent av teimum ungu, sum sjáldnari hugsa um hjúnaskilnað.
- 71 prosent av teimum ungu siga, at tey tosa við onnur, um tey hava trupulleikar, stúranir ella sorgir, meðan tað sama bara er galdandi fyri 62 prosent av teimum ungu, sum oftari hugsa um, at foreldrini fara hvør til sítt.
- 7 prosent av teimum ungu halda, at tað ein vanligan dag heima er vánaligur ella ógvuliga vánaligur stemnngur. 89 prosent halda, at stemningurin heima er góður ella rættiliga góður.
- Um tey ungu eru glað og nøgd, hongur saman við, hvussu stemningurin er heima. 43 prosent av teimum ungu, sum halda, at stemningurin heima er vánaligur ella ógvuliga vánaligur, eru ónøgd og óglað, meðan tað sama er galdandi fyri 12 prosent av teimum ungum, sum halda, at stemningurin heima er ógvuliga góður ella góður.

Kanninging, sum danska Barnaráðið hevur latið gjørt, er liður í størri kanning av familjulívi í Danmark. Tað er Veluxgrunnurin, sum hevur fíggjað kanningina. Greiningin av kanningini byggir á spurnablaðskanning millum 1537 næmingar í 8. flokki umframt samrøðum við seks næmingar í 8. flokki. Kanningin varð gjørd í mai 2015.

Kelda: http://www.boerneraadet.dk/