Tilgongdin at samansjóða lærararnar byrjar so spakuliga

Hóast skúlarnir í Sundalagnum er lagdir saman undir eina leiðslu, og komandi skúlaár verður fyrsta árið í søguni hjá Skúlanum við Streymin, er tilgongdin at leggja skúlarnar saman og samansjóða lærararnar heilt øðrvísi samanborið við í Skúlanum á Skúlatrøð í Klaksvík og Skúlanum á Fløtum í Havn.

07.03.2016

Skúlarnir í Hósvík og Hvalvík halda nevniliga fram í verandi líki, tó undir leiðslu av skúlastjóranum í Skúlanum við Streymin, við næmingum upp til 6. flokk, til nýggi skúlin stendur liðugur á Oyrabakka í 2018. Haldarsvíkar skúli verður tó niðurlagdur nú, tí síðstu næmingarnir, sum ganga har, ganga í 7. flokki. Allir 7. flokkarnir í kommununi fara at halda til í Felagsskúlanum frá komandi skúlaári at rokna.
- Tilgongdin at samansjóða lærararnar byrjar so spakuliga nú; eg havi  starvsfólkasamrøður við allar lærararnar komandi tvær vikurnar og tosi við teir um linjulærugreinir teirra og ynski og tankar um nýggja skúlan. Fyrsta vikan í mars er sett av til kunning um byggiætlanina og hvussu farið verður fram; allir lærarar fáa høvi til at koma fram við ynskjum. Seinni í mars taka vit nýggja heimasíðu í nýtslu, og síðan verða eini tvey samansjóðingartiltøk fyri summarsteðgin. Av tí at vit hava tvey ár, til nýggi skúlin stendur liðugur, nýtist okkum ikki at skunda ov nógv undir tilgongdina at samansjóða lærararnar, sigur Sonni Óli Djurhuus, skúlastjóri.

Samanborið við Skúlatrøð og Skúlan á Fløtum eru karmarnir í verandi skúlabygningum í Sundalagnum góðir. Skúlin ræður yvir nógvum og góðum hølum. Tá ið nýggi skúlin stendur liðugur, verða næmingarnir fluttir.
- Foreldrum nýtast ikki at stúra fyri, hvussu flutningurin av næmingunum fer at verða skipaður, tí kommunan tryggjar, at hann verður undir tryggum kørmum. Eftir mínum tykki er tað gott, at kommunan hevur valt at bíða við at flyta lærarar og næmingar, til bygningurin stendur liðugur. Í so máta haldi eg, at Sunda kommuna er eitt fyridømi.

Av tí at Skúlin við Streymin heldur til í fleiri hølum tvey ár afturat, eru kontaktlærarar í hvørjum einstøkum skúlabygningi.
- Meta hesir, at tørvur er á einum og hvørjum, til dømis kunning um tað, sum fer fram, so taka vit okkum av tí. Í eini tilgongd sum hesari, har skúlar við drúgvari søgu verða lagdir saman, og nógvar kenslur eru uppi í, er umráðandi at taka eitt stig í senn og alla tíðina kunna. Allar broytingar skapa frustratiónir, tí tú veitst, hvat tú hevur, men tú veitst ikki, hvat tú fært. Gomlu skúlarnir verða niðurlagdur, tí vit trúgva uppá, at tann nýggi verður eitt betri tilboð við betri fakligheit og betri undirvísing, men tað snýr seg um at fáa øll við. Nýggi skúlin kann eisini vera við at samansjóða alt Sundalagið sum heild.

Føroya Lærarafelag hevur kært Mentamálaráðið til Løgtingsins Umboðsmann fyri handfaringina av samanleggingini av skúlunum í Sundalagnum. Lærarafelagið heldur uppá, at sambært fólkaskúlalógini eigur úrslitið av fólkaatkvøðuni í Hósvík og Hvalvík at verða tikið til eftirtektar, og skúlarnir har halda fram, sum teir hava við sjálvstøðugari leiðslu. Mentamálaráðið heldur hinvegin, at skúlarnir kunnu halda fram, men undir felags leiðslu.
- Eg arbeiði undir teimum fortreytunum, sum eru. Skuldi tað verið, at Løgtingsins Umboðsmaður kemur til ta niðurstøðu, at samanleggingin ikki er farin rætt fram, og MMR og kommunan broyta fortreytirnar hjá mær at virka undir, so má eg fyrihalda meg til tær treytirnar og halda meg til tað. Eg vænti tó ikki, at tað, sum kommunan hevur sett út í kortið, broytist. Eg havi so onga ávirkan á málið og fari ikki at blanda meg upp í tað. Eg haldi meg til tær fortreytir, eg eri settur uppá, og tað er at skipa ein nýggjan skúla á einum stað.