Ráðstevna um avbjóðingar í skúlaverkinum

Í dag er ráðstevna í Norðurlandahúsinum við heitinum, Lærdómur er lættur at bera; ráðstevnan er um avbjóðingar í undirvísing og fysisku karmarnir fyri undirvísing.

12.05.2016

Nógv broytist á skúlaøkinum. Skúlar verða samanlagdir, og nýggir skúlar verða bygdir. Hava fysisku karmarnir fyri undirvísingina nakra ávirkan á úrslitið? Megnar undirvísingin at fylgja við menningini á kt-økinum? Stuðla teir fysisku karmarnir undir tørvin á fjøltáttaðari undirvísing og einstaklinga undirvísing?

Hesir og aðrir áhugaverdir spurningar verða reistir á ráðstevnuni, sum Jan á Argjaboða hevur tikið stig til.

Serfrøðingar á økinum varpa ljós á avbjóðingar, loysnir og geva íblástur. Landsstýriskvinnan í skúlamálum, Rigmor Dam, leggur fyri; síðan fer John-Erik Bang at tosa um læring og læringsstrategir; eftir matsteðg fer Rosan Bosch at halda upplegg, sum hon nevnir: Broytingar í heiminum byrja í skúlanum, og síðst á skránni er upplegg frá Anna Törnquist, ið hon kallar: at leggja til rættis skúlabygningar í framtíðini. Jan á Argjaboða tekur at enda saman um dagin.