Føroya Lærugrunnur farin í søguna

Føroya Lærugrunnur er í dag farin í søguna, og peningur grunsins latin Føroya Fólkaháskúla

08.04.2022

Á aðalfundi hósdagin tann 7. apríl 2022 hevur stýrið fyri Føroya Lærugrunn avgjørt at taka grunnin av og sambært viðtøkunum at lata peningin til eitt gott alment endamál.  

Avgjørt er at lata peningin til Føroya Fólkaháskúla. Peningurin er ætlaður til at umvæla eina fresku á skúlanum, sum Hans Hansen, listamaður, hevur málað, at gera eina gongd millum undirvísingarhølini á skúlanum og matarsalin, soleiðis at tað verður atkomuligt fyri rørslutarnað at sleppa inn í matarsalin, og at bjálva og klæða útveggin móti Frælsinum. 

Stovnsfæið var tann 2. januar 2022, kr. 624.278. Ongin stuðul er latin úr grunninum síðan 1995. 

Føroya Lærugrunnur varð stovnaður av ungmannafelagnum Merkinum í 1957. Endamálið við grunninum var at veita studning til føroysk ungfólk, ið ætlaðu at søkja sær andaliga ella handliga læru í Føroyum.  

Í stýrinum fyri Lærugrunn Føroya sita umboð fyri hesi feløg og stovnar:  

Ungmannafelagið Merkið (ungmannafelagið Merkið var avtikið í 2016), Løgtingið, Havnar Handverkarafelag, Føroya Lærarafelag, Føroya Reiðarafelag, Føroya Fiskimannafelag og Føroya Arbeiðarafelag.  

Meira kunning fæst við at venda sær til Jacob Eli Olsen formann í Føroya Lærarafelag, tlf. 616863.