Einki fartelefonbann í fólkaskúlanum

Uppskotið hjá Bárði á Lakjuni, løgtingsmanni, er í dag fallið.

20.03.2025

Herfyri legði Bárður á Lakjuni, løgtingsmaður fyri Fólkaflokkin, uppskot til samtyktar um ikki at loyva fartelefonini í skúlanum. Í dag hevur onnur viðgerð verið av uppskotinum. Uppskotið fall við greiðum meiriluta.

- Sosiala  eksperimentið  við  fartelefonini,  sum  hevur  koyrt  uttan  steðg  í  mong  ár  eftirhondini,  skal steðga, og fólkaskúlin er tað staðið, har vit saman kunnu byrja. Vit taka ikki frælsi frá børnunum og teimum  ungu  á  henda  hátt – nei,  vit  geva  teimum  frælsi. Tað  er  møguligt,  at  tey  ikki  duga  ikki  at síggja virðið í tí her og nú, men vit vaksnu eiga at vita betur. Tað eru foreldrini og tey avvarðandi, ið skulu  syrgja  fyri,  at  reglurnar verða  yvirhildnar,  og  at  teirra  barn  ikki  hevur  telefonina  við.  Tað  er hvørki rætt ella rímiligt, at lærarin skal ganga og taka telefonirnar inn hvønn einasta morgun. Og tað er  heldur  ikki  rætt,  at  skúlin  skal  liggja  inni  við  telefonum  fyri  hundraðtúsundavís,  ja,  í  summum førum allarhelst eisini milliónavís av krónum hvønn einasta dag, segði tingmaðurin í viðmerkingunum til uppskotið.

Lærarafelagið hevur mælt frá at seta forboð við lóg fyri fartelefon í skúlanum.

- Skúlarnir hava fingið heimild at tálma nýtsluni av fartelefon í skúladegnum í kunngerðini um atferðarreglur í fólkaskúlanum, sum landsstýrisfólkið lýsti í oktober í 2024. Í kunngerðini er ein nýggj áseting um at “tálma fartelefonnýtslu í skúladegnum”. Saman við kunngerðini er eisini eitt tilmæli til atferðarreglurnar, sum ásetur, at “fartelefonnýtsla verður avmarkað so nógv sum til ber í skúladegnum, so at meginreglan verður, at næmingarnir ikki nýta fartelefon, hvørki í undirvísingartímum ella fríkorterum,” segði Jacob Eli S. Olsen, formaður Føroya Lærarafelags, í grein í vikuni.

Tá ið avtornaði mælti ein greiður meiriluti í mentamálanevnd løgtingsins frá at samtykkja lógaruppskotið um fartelefonbann í løgtinginum, og seinnapartin í dag fall uppskotið.

Tað ber til at lesa skjøl í málinum og lurta eftir orðaskiftinum her 

Lesið eisini, hvussu tey handfara fartelefonina í Skúlanum í Eysturkommunu her og í Sørvágs skúla her.

Mynd: kvf.fo