Hvør kann finna upp á besta lesiátakið?

Føroyar lesa skipar fyri kapping um besta lesiátakið fyri dagstovnar, fólkaskúlar og miðnámsskúlar skúlaárið 2024/25. Kappingin hevur til endamáls at leggja lunnar undir góðar lesivanar hjá teimum ungu.

19.03.2025

Eitt lesiátak kann vera at skipa lesiløtur, at gera eitt poddvarp, ein bókavarða, at seta bókasavnsvitjanir á skránna, at gera sjónleik, sang ella annað burtur úr søgum, evnisdagar um yndissøgur ella okkurt heilt annað. Bara hugflogið setur markið. Endamálið er at gera lesingina stuttliga.

Eingi krøv eru fyri at luttaka, og vit vóna, at so nógvir stovnar og skúlar sum gjørligt vilja luttaka.

Freistin at lata inn frágreiðing og myndir, sum lýsa átakið, er 1. apríl 2025. Vinnarin verður kosin 1. mai.

Vinn 3 x 5000 krónur!

Tey trý vinnandi hugskotini vinna 5.000 krónur hvør. Vinnararnir kunnu vera ein stova, ein flokkur, ein bólkur ella ein stovnur. Tað er sjálvt hugskotið, sum vigar mest.​

Dómsnevndin er mannað av námsfrøðingi, lærara, bókavørði og umboðum fyri Føroyar lesa. 

Soleiðis gera tit

Hvør luttakandi bólkur skal lata inn eina frágreiðing um átakið. Frágreiðingin skal lýsa átakið við orðum, myndum og møguliga filmsbroti, sum vísir, hvussu átakið var skipað. Ynskiligt er, at endamálið við átakinum er greitt, og at børn og næmingar hava verið virkin í átakinum.

Øll innkomin hugskot verða savnað í hugskotsbanka hjá Føroyar lesa.

Les meiri her

​