Tíðindi

Erla Olsen sett sum dekanur á Námsvísindadeildini

Stýrið fyri Fróðskaparsetur Føroya hevur í dag boðað frá, at tikið verður undir við tilmælinum frá setanarnevndini um, at Erla Olsen, lektari, verður sett í starv sum dekanur á Námsvísindadeildini. Eftir ætlan byrjar hon í nýggja starvinum um mánaðarskiftið mars/apríl.

01.03.2018

Erla Olsen avloysir soleiðis fyrrverandi dekanin, Janus Jensen, sum fór frá fyri aldur í august í fjør. Sigurð í Jákupsstovu, rektari, hevur røkt dekanstarvið ímeðan.

Erla Olsen er PhD í lívfrøði og lektari í lívfrøði og náttúrulæringarfrøði á Námsvísindadeildini á Fróðskaparsetri Føroya. Hon hevur verið útbúgvingarleiðari fyri læraraútbúgvingina síðani síðsta summar. Erla hevur starvast á Námsvísindadeildini síðan 2011, har hon mest hevur undirvíst læraralesandi innan náttúruvísindaliga økið, men eisini undirvíst í skeiðum á pedagogútbúgvingini. Hon virkar eisini sum álitisfólk vegna vísindastarvsfólk á Setrinum.

Erla fekk lektaraheiti í mai í fjør, grundað bæði á hennara lívfrøðiligu førleikar og á førleikar innan undirvísing og læring, sum er hennara nýggja fakøkið tengt at starvinum á Námsvísindadeildini. Gransking hennara innan námsvísindi hevur m.a. snúð seg um hugburð og avrik hjá lærarum og skúlanæmingum til undirvísing og læring, serliga í mun til náttúruvísindalig evni.

Umframt størv síni á Setrinum hevur Erla arbeitt í nógv ár á øðrum granskingarstovnum sum granskari, so sum á Náttúrugripasavninum og á Heilsufrøðiligu Starvsstovuni. Hartil hevur hon verið forkvinna í Magistarafelagnum og virkar sum ritstjóri á Fróðskaparritum.

Erla Olsen lýsir sjálv sínar ætlanir við starvinum m.a soleiðis.: “Ein av høvuðsorsøkunum til, at eg bjóðaði meg fram til dekanstarvið, er ynski um at menna verandi útbúgvingarnar á Námsvísindadeildini og at virka fyri, at starvsfólk fáa møguleika at førleikamenna seg, soleiðis at deildin veruliga kann veita granskingargrundaða undirvísing. Eisini ynski eg at virka fyri, at næmingar á framhaldsdeildini í fólkaskúlanum, sum frá líður, hava lærarar við útbúgving á masterstigi, og harvið minka um gloppið millum fólkaskúlan og miðnám. Henda tilgongd er neyðug, um føroyska samfelagið skal mennast samsvarandi teimum krøvum, sum londini kring okkum seta.”

Kelda: setur.fo


Samband

Skúlablaðið

Pedda við Stein gøtu 9

100 Tórshavn

Tel. 23 57 73

Teldupostur: turid@bfl.fo ella skulabladid@lararafelag.fo


2015 © Bókadeildin. All rights reserved.